ليه كدة يا ريسنا ده احنا بنحبك وبنحترمك وبنجلك وبنقدرك ليه كدة اتنكدت نكد جامد النهاردة افتح الجرنال علي صورتك الكريمة مع صورة شمعون بيريز غير الكريمة تقول عنه داعية سلام والله حرام عليك مش كدة انت ليك شعب مصري وعربي بيحبك ويحترمك ويتابعك ليه تحرق دمنا علي الصبح احنا عملنالك حاجة ؟! كل يوم نمدح سيادتك ونفخمك وننفخك ونفسيك عايز ايه تاني … حكمتنا 28 سنة وقلنا وماله ميهمش اهو انت اولي من الغريب … قولت عايز تحكم ابنك بعدك قلنا وماله اديه عنده خبرة منك وحيعرف يركبنا ويدلدل رجليه … تقول حشيل حكومة ححط حكومة محدش قالك ليه ولا امتي تغير مادة اتنين تلاتة اربعة وتلاتين من الدستور حقك انت اهم وظيفة ليك انك تحترم الدستور ونشهد انك احترمته لدرجة القداسة … لكن كله الا كدة انك تقول بصراحة وعلنية علي واحد سفاح صهيوني كافر بالسلام والانسانية داعية سلام !!!!

تخيل كدة معايا واحد قطري او سعودي او ايراني سمع الكلام ده من ريسنا المنتخب ديمقراطيا من اغلبية الشعب بيقول كلام زي كدة اكيد ده بيكون بيعبر عن رأي اغلبية الشعب اللي هو المفروض بيمثلها … تفتكر حيحب مصر ويحترمها بلاش لو واحد فلسطيني سمعك حمساوي او فتحاوي او حتي شيبيساوي حيقول عننا ايه لما نيجي نقولهم احنا بندعمكم ومعاكم انت ايدك في ايدي النهاردة وفي ايد عدوي بكرة … عايز اقول للريس وانا عارف كويس انه بيدخل علي مدونتي كل يوم .. انت سقطت في نظري اوي النهاردة وسقطت في نظر الكثير من معجبيك ومريديك اللي كانوا بالملايين بس متقلقش حنسامحك بعد شوية وننسي مش معني ان سقطت في نظري .. انك تسقطت في الانتخابات !!!!